tum lakh koi hashr uThao pas-e-diwar

tum laakh koī hashr uThāo pas-e-dīvār

ye shahr hai bahroñ kā sunāo pas-e-dīvār

kyā farq tumheñ is se koī jaage na jaage

naubat to bajānī hai bajāo pas-e-dīvār

ik habs kā māhaul jo darkār hai tum ko

ik aur bhī dīvār banāo pas-e-dīvār

har chiiz mayassar hai yahāñ maal ke badle

insāf kā bhī lagtā hai bhaao pas-e-dīvār

le jā.egā ye saarī ġhalāzat ko bahā kar

ho jaa.e jo dariyā kā bahāv pas-e-dīvār

allāh 'nadīm' ham ko havādis se bachā.e

pahle bhī lagā thā hameñ ghaav pas-e-dīvār

tum lakh koi hashr uThao pas-e-diwar

ye shahr hai bahron ka sunao pas-e-diwar

kya farq tumhein is se koi jage na jage

naubat to bajaani hai bajao pas-e-diwar

ek habs ka mahaul jo darkar hai tum ko

ek aur bhi diwar banao pas-e-diwar

har chiz mayassar hai yahan mal ke badle

insaf ka bhi lagta hai bhao pas-e-diwar

le jaega ye sari ghalazat ko baha kar

ho jae jo dariya ka bahaw pas-e-diwar

allah 'nadim' hum ko hawadis se bachae

pahle bhi laga tha hamein ghaw pas-e-diwar