tum mujhe bhi kanch ki poshak pahnane lage

tum mujhe bhī kāñch kī poshāk pahnāne lage

maiñ jise dekhūñ vahī patthar nazar aane lage

be-sabab ghar se nikal kar aa ga.e bāzār meñ

aa.ina dekhā nahīñ tasvīr chhapvāne lage

dasht meñ pahuñche to tanhā.ī mukammal ho ga.ī

baḌh ga.ī vahshat to phir ḳhud se hī Takrāne lage

ḳhuun kā nashsha chaḌhā to jism zahrīlā huā

ḳhvāhishoñ ke pāniyoñ meñ saañp lahrāne lage

kuchh nahīñ hai zehn meñ to vahm kī shakleñ banā

raushnī hogī agar saa.e nazar aane lage

dekhnā chāhā to vo āñkhoñ se ojhal ho gayā

chūmnā chāhā to mere hoñT pathrāne lage

rañg āḳhir le hī aayā merī sochoñ kā jumūd

barf ke sūraj balā kī dhuup phailāne lage

chal paḌe to ho liye 'iqbāl-sājid' apne saath

thak ga.e to apne hī saa.e haiñ sustāne lage

tum mujhe bhi kanch ki poshak pahnane lage

main jise dekhun wahi patthar nazar aane lage

be-sabab ghar se nikal kar aa gae bazar mein

aaina dekha nahin taswir chhapwane lage

dasht mein pahunche to tanhai mukammal ho gai

baDh gai wahshat to phir KHud se hi Takrane lage

KHun ka nashsha chaDha to jism zahrila hua

KHwahishon ke paniyon mein sanp lahrane lage

kuchh nahin hai zehn mein to wahm ki shaklen bana

raushni hogi agar sae nazar aane lage

dekhna chaha to wo aankhon se ojhal ho gaya

chumna chaha to mere honT pathrane lage

rang aaKHir le hi aaya meri sochon ka jumud

barf ke suraj bala ki dhup phailane lage

chal paDe to ho liye 'iqbaal-sajid' apne sath

thak gae to apne hi sae hain sustane lage