تم مضطرب نہیں مرے حال تباہ سے

تم مضطرب نہیں مرے حال تباہ سے

دیکھو ذرا نگاہ ملا کر نگاہ سے

دیکھا تو ہوگا تم نے ہمارا مقام بھی

گزرے کبھی تو ہو گے محبت کی راہ سے

بزم جہاں میں کوئی تجلیٔ دل نواز

بچ کر کبھی گئی نہ ہماری نگاہ سے

قائم ہے یہ جہاں تری عصمت ہی سے مگر

رونق جہاں کی ہے مرے ذوق گناہ سے

وہ دل رہین کشمکش اضطراب و کیف

وہ عذر بے رخی نگہ گاہ گاہ سے

سب کچھ ہے اور کچھ نہیں اے داد خواہ عشق

وہ دیکھ کر نہ دیکھنا نیچی نگاہ سے