tumne dekha hi nahin hai wo nizam-e-maKHsus

tum ne dekhā hī nahīñ hai vo nizām-e-maḳhsūs

kū-e-jānāñ meñ hamārā hai qayām-e-maḳhsūs

mujtam.a aaj haiñ yārān-e-sar-e-pul saare

ḳhalvat-e-ḳhās meñ hai majma-e-ām-e-maḳhsūs

jalsa-e-ām meñ diqqat nahīñ hotī un ko

jo samajhte haiñ ishāroñ meñ kalām-e-maḳhsūs

dil-e-ġham-dīda huā hamdam-e-sad-gūna-nashāt

aaj aayā hai jau dilbar kā payām-e-maḳhsūs

vo mirā sub.h-nafas muḳhlis-e-yak-rañg huā

ab na vo sub.h-e-muqarrar hai na shām-e-maḳhsūs

ḳhuub e.azāz giraftār-e-mohabbat kā huā

un ko hai madd-e-nazar qaid-e-davām-e-maḳhsūs

aam se ḳhaas kī tam.īz huā kartī hai

ho gayā nok-e-zabāñ shoḳh ko nām-e-maḳhsūs

naqs ye vaz.a kā ho jā.egā dāġh-e-ismat

kyuuñ vo shab-gard huā māh-e-tamām-e-maḳhsūs

rāzdāñ jo haiñ samajhte haiñ vo ye rāz-o-niyāz

guftugū ḳhaas se hotā hai kalām-e-maḳhsūs

hai tirā bulbul-e-kashmīr yagāna mai-kash

aam hotā hī nahīñ sharb-e-davām-e-maḳhsūs

tum ne dekha hi nahin hai wo nizam-e-maKHsus

ku-e-jaanan mein hamara hai qayam-e-maKHsus

mujtama aaj hain yaran-e-sar-e-pul sare

KHalwat-e-KHas mein hai majma-e-am-e-maKHsus

jalsa-e-am mein diqqat nahin hoti un ko

jo samajhte hain ishaaron mein kalam-e-maKHsus

dil-e-gham-dida hua hamdam-e-sad-guna-nashat

aaj aaya hai jau dilbar ka payam-e-maKHsus

wo mera subh-nafas muKHlis-e-yak-rang hua

ab na wo subh-e-muqarrar hai na sham-e-maKHsus

KHub eazaz giraftar-e-mohabbat ka hua

un ko hai madd-e-nazar qaid-e-dawam-e-maKHsus

aam se KHas ki tamiz hua karti hai

ho gaya nok-e-zaban shoKH ko nam-e-maKHsus

naqs ye waza ka ho jaega dagh-e-ismat

kyun wo shab-gard hua mah-e-tamam-e-maKHsus

raazdan jo hain samajhte hain wo ye raaz-o-niyaz

guftugu KHas se hota hai kalam-e-maKHsus

hai tera bulbul-e-kashmir yagana mai-kash

aam hota hi nahin sharb-e-dawam-e-maKHsus