tumne jab zulf-e-pareshan ko sanwara hoga

tum ne jab zulf-e-pareshāñ ko sañvārā hogā

sadqa-e-husn ghaTāoñ ne utārā hogā

aap kī chashm-e-karam kā jo ishāra hogā

auj par mere muqaddar kā sitāra hogā

sang-dil tere bhī aañsū nikal aa.e hoñge

Dūbne vaale ne jab tujh ko pukārā hogā

maiñ ne ilzām ḳhushī se liye sab apne sar

aap badnām huuñ ye kis ko gavāra hogā

kuchh to qismat kī hai sāzish mirī barbādī meñ

aur kuchh un kī bhī nazroñ kā ishāra hogā

kyā ġharaz us ko zamāne kī ḳhushī se 'dānish'

yaar kā ġham hī jise jaan se pyārā hogā

tum ne jab zulf-e-pareshan ko sanwara hoga

sadqa-e-husn ghaTaon ne utara hoga

aap ki chashm-e-karam ka jo ishaara hoga

auj par mere muqaddar ka sitara hoga

sang-dil tere bhi aansu nikal aae honge

Dubne wale ne jab tujh ko pukara hoga

main ne ilzam KHushi se liye sab apne sar

aap badnam hun ye kis ko gawara hoga

kuchh to qismat ki hai sazish meri barbaadi mein

aur kuchh un ki bhi nazron ka ishaara hoga

kya gharaz us ko zamane ki KHushi se 'danish'

yar ka gham hi jise jaan se pyara hoga