tumne jo manfat se KHasara badal diya

tum ne jo manfa.at se ḳhasāra badal diyā

ham ne mufāhamat kā irāda badal diyā

ai bevafā hayāt tirī gardishoñ kī ḳhair

tū ne bhī kaisā vaqt sunahrā badal diyā

koī to vārdāt huī hai jī us ke saath

kuchh to hai jis ne ye dil-e-sāda badal diyā

go jītnā hamārī baqā kā savāl thā

lekin bisāt-e-vaqt ne mohara badal diyā

pahle to ziist karne kī himmat thī āhanī

kam-mā.egī thī jis ne irāda badal diyā

mafhūm jaan lene se qāsir nahīñ haiñ ham

to kyā huā ki aap ne fiqra badal diyā

ye raushnī kā aadī rahā hai tamām umr

tārīkiyoñ ne shahr kā naqsha badal diyā

apnī tarah ke ek hī haiñ aap bhī janāb

jab ham badal ga.e to irāda badal diyā

ye ishq hī kā vasf rahā hai ki 'sā.ima'

dil pe chaḌhā thā rañg jo gahrā badal diyā

tum ne jo manfat se KHasara badal diya

hum ne mufahamat ka irada badal diya

ai bewafa hayat teri gardishon ki KHair

tu ne bhi kaisa waqt sunahra badal diya

koi to wardat hui hai ji us ke sath

kuchh to hai jis ne ye dil-e-sada badal diya

go jitna hamari baqa ka sawal tha

lekin bisat-e-waqt ne mohara badal diya

pahle to zist karne ki himmat thi aahani

kam-maegi thi jis ne irada badal diya

mafhum jaan lene se qasir nahin hain hum

to kya hua ki aap ne fiqra badal diya

ye raushni ka aadi raha hai tamam umr

tarikiyon ne shahr ka naqsha badal diya

apni tarah ke ek hi hain aap bhi janab

jab hum badal gae to irada badal diya

ye ishq hi ka wasf raha hai ki 'saima'

dil pe chaDha tha rang jo gahra badal diya