tumne mere kirdar pe ungli jo uTha di

tum ne mire kirdār pe uñglī jo uThā dī

samjho mire ajdād kī dīvār girā dī

bīmār huī maañ to raqam bhej dī maiñ ne

afsos magar hai ki na hāthoñ se davā dī

nārāz bhalā kyoñ ho jo lab chuum liyā hai

hāthoñ ko pakaḌ kar mire tum ne hī havā dī

ik maiñ huuñ jo ghar phūñk ke kartā huuñ ujālā

ik tum ho ki sham'-e-shab-e-ehsās bujhā dī

bachchoñ kī tarah pyaar kiyā baat bhī maanī

shāyad isī ulfat kī hī tum ne bhī sazā dī

kyoñ bhej rahe lā'nteñ ġhairoñ ke sitam par

bolo kabhī tum ne bhī mujhe dil se du'ā dī

tum ne mere kirdar pe ungli jo uTha di

samjho mere ajdad ki diwar gira di

bimar hui man to raqam bhej di main ne

afsos magar hai ki na hathon se dawa di

naraaz bhala kyon ho jo lab chum liya hai

hathon ko pakaD kar mere tum ne hi hawa di

ek main hun jo ghar phunk ke karta hun ujala

ek tum ho ki sham'-e-shab-e-ehsas bujha di

bachchon ki tarah pyar kiya baat bhi mani

shayad isi ulfat ki hi tum ne bhi saza di

kyon bhej rahe la'nten ghairon ke sitam par

bolo kabhi tum ne bhi mujhe dil se du'a di