تم سلامت رہو وحشت جاں سے کیا کچھ ہوائے زمستاں ہی بہلائے گی

تم سلامت رہو وحشت جاں سے کیا کچھ ہوائے زمستاں ہی بہلائے گی

مرگ عشاق ارزاں ہوئی بھی تو کیا موسم گل میں تازہ ہوا آئے گی

جس کے کوزے کے پانی سے دوزح بجھے اور انگیٹھی کے شعلے سے جنت جلے

کوئی ایسا ہو گر صاحبان حرم کام اس وقت اس کی مثال آئے گی

چاک داماں سے ہے جو بہار آشکار اس پہ دور خزاں کا تسلط نہیں

اک تصور نمو کا بھی ہے کارگر شاخ گل آپ سینہ میں لہرائے گی

تم کہو تو چلا جاؤں اس شہر سے اس فضا میں ہلاکت ہے جاگی ہوئی

سارے ہانکے میں بھاگے ہوئے جانور یہ ہوا یہ صدا دل کو کھا جائے گی

رات کی یہ ہوا نرم ایسی کہ بس نیند کی ایک چڑھتی ہوئی بیل میں

جاگتی آنکھ میں بھی جو کھلتے رہیں پھول ایسے ہزاروں کھلا جائے گی

مر گیا مدنیؔ خوش نوا راہ میں جانتا تھا سر دشت اک روشنی

اس سے پہلے کہ منزل کوئی آ سکے پاؤں سن کر کے مرگ جنوں لائے گی