tum salamat raho wahshat-e-jaan se kya kuchh hawa-e-zamistan hi bahlaegi

tum salāmat raho vahshat-e-jāñ se kyā kuchh havā-e-zamistāñ hī bahlā.egī

marg-e-ushshāq arzāñ huī bhī to kyā mausam-e-gul meñ taaza havā aa.egī

jis ke kuuze ke paanī se dozaḳh bujhe aur añgīThī ke sho.ale se jannat jale

koī aisā ho gar sāhibān-e-haram kaam is vaqt us kī misāl aa.egī

chāk-e-dāmāñ se hai jo bahār āshkār us pe daur-e-ḳhizāñ kā tasallut nahīñ

ik tasavvur numū kā bhī hai kārgar shāḳh-e-gul aap siine meñ lahrā.egī

tum kaho to chalā jā.ūñ is shahr se is fazā meñ halākat hai jaagī huī

saare hāñke meñ bhāge hue jānvar ye havā ye sadā dil ko khā jā.egī

raat kī ye havā narm aisī ki bas niiñd kī ek chaḌhtī huī bel meñ

jāgtī aañkh meñ bhī jo khilte raheñ phuul aise hazāroñ khilā jā.egī

mar gayā 'madnī'-e-ḳhush-navā raah meñ jāntā thā sar-e-dasht ik raushnī

is se pahle ki manzil koī aa sake paañv sun kar ke marg-e-junūñ lā.egī

tum salamat raho wahshat-e-jaan se kya kuchh hawa-e-zamistan hi bahlaegi

marg-e-ushshaq arzan hui bhi to kya mausam-e-gul mein taza hawa aaegi

jis ke kuze ke pani se dozaKH bujhe aur angiThi ke shoale se jannat jale

koi aisa ho gar sahiban-e-haram kaam is waqt us ki misal aaegi

chaak-e-daman se hai jo bahaar aashkar us pe daur-e-KHizan ka tasallut nahin

ek tasawwur numu ka bhi hai kargar shaKH-e-gul aap sine mein lahraegi

tum kaho to chala jaun is shahr se is faza mein halakat hai jagi hui

sare hanke mein bhage hue jaanwar ye hawa ye sada dil ko kha jaegi

raat ki ye hawa narm aisi ki bas nind ki ek chaDhti hui bel mein

jagti aankh mein bhi jo khilte rahen phul aise hazaron khila jaegi

mar gaya 'madni'-e-KHush-nawa rah mein jaanta tha sar-e-dasht ek raushni

is se pahle ki manzil koi aa sake panw sun kar ke marg-e-junun laegi