تم سے کوئی گلہ نہیں ہوتا

تم سے کوئی گلہ نہیں ہوتا

ہم کو اپنا کہا نہیں ہوتا

ہم کو کیا شوق تھا گناہوں کا

باب رحمت جو وا نہیں ہوتا

پوچھتے کیا ہو عشق کا انجام

کاش دل مبتلا نہیں ہوتا

دل جو ہوتا ہے مائل دنیا

موجب ارتقا نہیں ہوتا

ایک ایسی نظر بھی ہوتی ہے

جس میں اچھا برا نہیں ہوتا

یوں تو وہ دل کے پاس رہتے ہیں

آمنا سامنا نہیں ہوتا

جس کی ہوتی ہے مال و زر پہ نظر

وہ کسی کا سگا نہیں ہوتا

ہم خدا کو تلاش کرتے ہیں

جو ملے وہ خدا نہیں ہوتا

جس سے نظریں وہ پھیر لیتے ہیں

آشنائے شفاؔ نہیں ہوتا