tum se koi gila nahin hota

tum se koī gila nahīñ hotā

ham ko apnā kahā nahīñ hotā

ham ko kyā shauq thā gunāhoñ kā

bāb-e-rahmat jo vā nahīñ hotā

pūchhte kyā ho 'ishq kā anjām

kaash dil mubtalā nahīñ hotā

dil jo hotā hai mā.il-e-duniyā

mūjib-e-irtiqā nahīñ hotā

ek aisī nazar bhī hotī hai

jis meñ achchhā-burā nahīñ hotā

yuuñ to vo dil ke paas rahte haiñ

āmnā-sāmnā nahīñ hotā

jis kī hotī hai māl-o-zar pe nazar

vo kisī kā sagā nahīñ hotā

ham ḳhudā ko talāsh karte haiñ

jo mile vo ḳhudā nahīñ hotā

jis se nazreñ vo pher lete haiñ

āshnā-e-'shifā' nahīñ hotā

tum se koi gila nahin hota

hum ko apna kaha nahin hota

hum ko kya shauq tha gunahon ka

bab-e-rahmat jo wa nahin hota

puchhte kya ho 'ishq ka anjam

kash dil mubtala nahin hota

dil jo hota hai mail-e-duniya

mujib-e-irtiqa nahin hota

ek aisi nazar bhi hoti hai

jis mein achchha-bura nahin hota

yun to wo dil ke pas rahte hain

aamna-samna nahin hota

jis ki hoti hai mal-o-zar pe nazar

wo kisi ka saga nahin hota

hum KHuda ko talash karte hain

jo mile wo KHuda nahin hota

jis se nazren wo pher lete hain

aashna-e-'shifa' nahin hota