tum se kuchh kahne ko tha bhul gaya

tum se kuchh kahne ko thā bhuul gayā

haa.e kyā baat thī kyā bhuul gayā

bholī bholī jo vo sūrat dekhī

shikva-e-jaur-o-jafā bhuul gayā

dil meñ baiThā hai ye ḳhauf us but kā

haath uTThe ki duā bhuul gayā

ḳhush huuñ is vāda-farāmoshī se

us ne hañs kar to kahā bhuul gayā

hāl-e-dil sunte hī kis lutf se haa.e

kuchh kahā kuchh jo rahā bhuul gayā

vaañ kis ummīd pe phir jaa.e koī

ai dil us baat ko kyā bhuul gayā

hosh meñ aa ke sunā kuchh qāsid

yaad kyā hai tujhe kyā bhuul gayā

ahd kyā thā mujhe kuchh yaad nahīñ

yahī gar bhuul gayā bhuul gayā

maiñ idhar bhuul gayā ranj-e-firāq

vo udhar uzr-e-jafā bhuul gayā

yaad meñ ek sanam kī nāseh

maiñ to sab kuchh ba-ḳhudā bhuul gayā

ḳhair mujh par to jo guzrī guzrī

shukr vo tarz-e-vafā bhuul gayā

yaad us kī hai mirī ziist 'nizām'

maut aa.ī jo zarā bhuul gayā

tum se kuchh kahne ko tha bhul gaya

hae kya baat thi kya bhul gaya

bholi bholi jo wo surat dekhi

shikwa-e-jaur-o-jafa bhul gaya

dil mein baiTha hai ye KHauf us but ka

hath uTThe ki dua bhul gaya

KHush hun is wada-faramoshi se

us ne hans kar to kaha bhul gaya

haal-e-dil sunte hi kis lutf se hae

kuchh kaha kuchh jo raha bhul gaya

wan kis ummid pe phir jae koi

ai dil us baat ko kya bhul gaya

hosh mein aa ke suna kuchh qasid

yaad kya hai tujhe kya bhul gaya

ahd kya tha mujhe kuchh yaad nahin

yahi gar bhul gaya bhul gaya

main idhar bhul gaya ranj-e-firaq

wo udhar uzr-e-jafa bhul gaya

yaad mein ek sanam ki naseh

main to sab kuchh ba-KHuda bhul gaya

KHair mujh par to jo guzri guzri

shukr wo tarz-e-wafa bhul gaya

yaad us ki hai meri zist 'nizam'

maut aai jo zara bhul gaya