tum se mil kar ye laga KHud se mulaqat hui

tum se mil kar ye lagā ḳhud se mulāqāt huī

aaj ye bāb-e-mohabbat meñ na.ī baat huī

ab na pahlī sī tavajjoh na vo pahlā sā sulūk

ḳhatm ab jaise har ik rasm-e-murā’āt huī

chhaT ga.e sar se mire ranj-o-alam ke bādal

rāt-bhar āñkhoñ se ashkoñ kī vo barsāt huī

ham musāfir the rah-e-ishq ke yā ḳhāna-ba-dosh

din kahīñ ham ne guzārā to kahīñ raat huī

ham se insānoñ kī is ālam-e-hastī meñ bhalā

kis ko mā'lūm hai kaise basar-auqāt huī

āḳhirī vaqt meñ vo aa.e haiñ pursish ko mirī

fasl-e-jāñ suukh ga.ī apnī to barsāt huī

'fauziya' mil hī ga.ī manzil-e-maqsūd hameñ

shukr hai gardish-e-ayyām ko bhī maat huī

tum se mil kar ye laga KHud se mulaqat hui

aaj ye bab-e-mohabbat mein nai baat hui

ab na pahli si tawajjoh na wo pahla sa suluk

KHatm ab jaise har ek rasm-e-mura’at hui

chhaT gae sar se mere ranj-o-alam ke baadal

raat-bhar aankhon se ashkon ki wo barsat hui

hum musafir the rah-e-ishq ke ya KHana-ba-dosh

din kahin hum ne guzara to kahin raat hui

hum se insanon ki is aalam-e-hasti mein bhala

kis ko ma'lum hai kaise basar-auqat hui

aaKHiri waqt mein wo aae hain pursish ko meri

fasl-e-jaan sukh gai apni to barsat hui

'fauziya' mil hi gai manzil-e-maqsud hamein

shukr hai gardish-e-ayyam ko bhi mat hui