tum se nafrat na ki ki chah na ki

tum se nafrat na kī ki chaah na kī

tum se kis kis tarah nibāh na kī

be-hisī se kiye rahe taarī

aur hāsil koī panāh na kī

rāh-e-dil ho ki rāh-e-duniyā ho

gaah kī iḳhtiyār gaah na kī

muñh pe kālak zarūr malvā lī

apnī fard-e-amal siyāh na kī

dā.imī zindagī ke lālach meñ

'ārzī zindagī tabāh na kī

dil kā hamdard kaun ho jis ne

kabhī parvā-e-intibāh na kī

husn kā sā.ebāñ kushāda rahā

kī mohabbat kisī ne ḳhvāh na kī

jis ne us kī taraf nigāh uThā.ī

phir kisī kī taraf nigāh na kī

'umr kyā shai thī kyā batā.ūñ 'shu'ūr'

tū ne kis shai kī qadr aah na kī

tum se nafrat na ki ki chah na ki

tum se kis kis tarah nibah na ki

be-hisi se kiye rahe tari

aur hasil koi panah na ki

rah-e-dil ho ki rah-e-duniya ho

gah ki iKHtiyar gah na ki

munh pe kalak zarur malwa li

apni fard-e-amal siyah na ki

daimi zindagi ke lalach mein

'arzi zindagi tabah na ki

dil ka hamdard kaun ho jis ne

kabhi parwa-e-intibah na ki

husn ka saeban kushada raha

ki mohabbat kisi ne KHwah na ki

jis ne us ki taraf nigah uThai

phir kisi ki taraf nigah na ki

'umr kya shai thi kya bataun 'shu'ur'

tu ne kis shai ki qadr aah na ki