tum se nazar ke samne aaya na ja saka

tum se nazar ke sāmne aayā na jā sakā

shāyad nazar kā baar uThāyā na jā sakā

ham se tirā tasavvur-e-rangīñ tirā ḳhayāl

kiiñ laakh koshisheñ pe bhulāyā na jā sakā

bazm-e-tajalliyāt kī vāraftagī na pūchh

ye hosh thā ki hosh meñ aayā na jā sakā

thiiñ jalva-gar jo aap kī is meñ tajalliyāñ

dil 'ishq kī nazar se girāyā na jā sakā

vo to hazār rang se pūchhā kiye magar

ham se hī dil kā haal batāyā na jā sakā

nākām ho ga.ī mirī chashm-e-pur-āb bhī

sho'la bhaḌak gayā to bujhāyā na jā sakā

maujūd ho nigāh-e-tasavvur ke sāmne

ab to kaho ki tum se bulāyā na jā sakā

dast-e-gadā-navāz kā is meñ hai kyā qusūr

dast-e-talab hamīñ se baḌhāyā na jā sakā

apnī nigāh se to chhupāyā tumheñ magar

dil kī nazar se tum ko chhupāyā na jā sakā

un kī 'atā kī ḳhair ho 'bahzād'-e-mubtalā

vo kī 'atā ki jis ko bhulāyā jā sakā

tum se nazar ke samne aaya na ja saka

shayad nazar ka bar uThaya na ja saka

hum se tera tasawwur-e-rangin tera KHayal

kin lakh koshishen pe bhulaya na ja saka

bazm-e-tajalliyat ki waraftagi na puchh

ye hosh tha ki hosh mein aaya na ja saka

thin jalwa-gar jo aap ki is mein tajalliyan

dil 'ishq ki nazar se giraya na ja saka

wo to hazar rang se puchha kiye magar

hum se hi dil ka haal bataya na ja saka

nakaam ho gai meri chashm-e-pur-ab bhi

sho'la bhaDak gaya to bujhaya na ja saka

maujud ho nigah-e-tasawwur ke samne

ab to kaho ki tum se bulaya na ja saka

dast-e-gada-nawaz ka is mein hai kya qusur

dast-e-talab hamin se baDhaya na ja saka

apni nigah se to chhupaya tumhein magar

dil ki nazar se tum ko chhupaya na ja saka

un ki 'ata ki KHair ho 'bahzad'-e-mubtala

wo ki 'ata ki jis ko bhulaya ja saka