tum se poshida koi baat nahin

tum se poshīda koī baat nahīñ

haañ nahīñ jān-e-iltifāt nahīñ

har ghaḌī un kā dhyān un kā ḳhayāl

sub.h apnī nahīñ hai raat nahīñ

dil meñ kitnī hī dāstāneñ haiñ

aur hoñToñ pe koī baat nahīñ

kal yahī raat thī yahī ham the

aaj kī raat meñ vo baat nahīñ

ġham-e-jānāñ kabhī ġham-e-daurāñ

ġham se āḳhir hameñ najāt nahīñ

apnī manzil pe aa ga.ī hai hayāt

hādse aur sānehāt nahīñ

mil gayā hai kisī kā ġham 'rāje'

ab ġham-o-fikr-e-kā.enāt nahīñ

tum se poshida koi baat nahin

han nahin jaan-e-iltifat nahin

har ghaDi un ka dhyan un ka KHayal

subh apni nahin hai raat nahin

dil mein kitni hi dastanen hain

aur honTon pe koi baat nahin

kal yahi raat thi yahi hum the

aaj ki raat mein wo baat nahin

gham-e-jaanan kabhi gham-e-dauran

gham se aaKHir hamein najat nahin

apni manzil pe aa gai hai hayat

hadse aur sanehat nahin

mil gaya hai kisi ka gham 'raje'

ab gham-o-fikr-e-kaenat nahin