tum se ulfat ke taqaze na nibahe jate

tum se ulfat ke taqāze na nibāhe jaate

varna ham ko bhī tamannā thī ki chāhe jaate

dil ke māroñ kā na kar ġham ki ye andoh-nasīb

zaḳhm bhī dil meñ na hotā to karāhe jaate

kam-nigāhī kī hameñ ḳhud bhī kahāñ thī taufīq

kam-nigāhī ke liye uzr na chāhe jaate

kaash ai abr-e-bahārī tire bahke se qadam

merī ummīd ke sahrā meñ bhī gaahe jaate

ham bhī kyuuñ dahr kī raftār se hote pāmāl

ham bhī har laġhzish-e-mastī ko sarāhe jaate

lazzat-e-dard se āsūda kahāñ dil vaale

haiñ faqat dard kī hasrat meñ karāhe jaate

hai tire fitna-e-raftār kā shohrā kyā kyā

garche dekhā na kisī ne sar-e-rāhe jaate

dī na mohlat hameñ hastī ne vafā kī varna

aur kuchh din ġham-e-hastī se nibāhe jaate

tum se ulfat ke taqaze na nibahe jate

warna hum ko bhi tamanna thi ki chahe jate

dil ke maron ka na kar gham ki ye andoh-nasib

zaKHm bhi dil mein na hota to karahe jate

kam-nigahi ki hamein KHud bhi kahan thi taufiq

kam-nigahi ke liye uzr na chahe jate

kash ai abr-e-bahaari tere bahke se qadam

meri ummid ke sahra mein bhi gahe jate

hum bhi kyun dahr ki raftar se hote pamal

hum bhi har laghzish-e-masti ko sarahe jate

lazzat-e-dard se aasuda kahan dil wale

hain faqat dard ki hasrat mein karahe jate

hai tere fitna-e-raftar ka shohra kya kya

garche dekha na kisi ne sar-e-rahe jate

di na mohlat hamein hasti ne wafa ki warna

aur kuchh din gham-e-hasti se nibahe jate