tum shad raho mauj-e-saba bol rahi hai

tum shaad raho mauj-e-sabā bol rahī hai

har roz yahī taaza havā bol rahī hai

ham log kabhī sāhab-e-sarvat the yahāñ par

jismoñ kī ye bosīda qabā bol rahī hai

koī to mujhe aa ke yahāñ apne banā le

hāthoñ kī hathelī pe hinā bol rahī hai

tūfān-e-havādis kā tumheñ ḳhauf na hogā

hoñToñ pe buzurgoñ ke du'ā bol rahī hai

ye to kabhī aslāf kī dastār thī mere

jo sar pe hai tere vo ridā bol rahī hai

sar-tā-ba-qadam husn-e-mujassam vo lage hai

lahrātī huī bād-e-sabā bol rahī hai

allāh kā farmān hai uTh jaao rafīqo

hoñToñ pe muazzin ke sadā bol rahī hai

tum shad raho mauj-e-saba bol rahi hai

har roz yahi taza hawa bol rahi hai

hum log kabhi sahab-e-sarwat the yahan par

jismon ki ye bosida qaba bol rahi hai

koi to mujhe aa ke yahan apne bana le

hathon ki hatheli pe hina bol rahi hai

tufan-e-hawadis ka tumhein KHauf na hoga

honTon pe buzurgon ke du'a bol rahi hai

ye to kabhi aslaf ki dastar thi mere

jo sar pe hai tere wo rida bol rahi hai

sar-ta-ba-qadam husn-e-mujassam wo lage hai

lahraati hui baad-e-saba bol rahi hai

allah ka farman hai uTh jao rafiqo

honTon pe muazzin ke sada bol rahi hai