تم شاد رہو موج صبا بول رہی ہے

تم شاد رہو موج صبا بول رہی ہے

ہر روز یہی تازہ ہوا بول رہی ہے

ہم لوگ کبھی صاحب ثروت تھے یہاں پر

جسموں کی یہ بوسیدہ قبا بول رہی ہے

کوئی تو مجھے آ کے یہاں اپنے بنا لے

ہاتھوں کی ہتھیلی پہ حنا بول رہی ہے

طوفان حوادث کا تمہیں خوف نہ ہوگا

ہونٹوں پہ بزرگوں کے دعا بول رہی ہے

یہ تو کبھی اسلاف کی دستار تھی میرے

جو سر پہ ہے تیرے وہ ردا بول رہی ہے

سر تا بہ قدم حسن مجسم وہ لگے ہے

لہراتی ہوئی باد صبا بول رہی ہے

اللہ کا فرمان ہے اٹھ جاؤ رفیقو

ہونٹوں پہ مؤذن کے صدا بول رہی ہے