تم تکبر سے کسی روز نکل کر دیکھو

تم تکبر سے کسی روز نکل کر دیکھو

اپنی نفرت کو محبت میں بدل کر دیکھو

رو بھی سکتا ہے گلے لگ کے تمہارا دشمن

تم عداوت کو مٹانے کی پہل کر دیکھو

اپنی ہمت سے ہی تاریخ بدل دو گے تم

زہر دیتی ہے یہ دنیا تو نگل کر دیکھو

لڑکھڑانے کے بہانے تو ہزاروں ہوں گے

تم کو چلنا ہے تو اپنے سے سنبھل کر دیکھو

اپنی الجھن کو ذرا دیر کنارے رکھ کر

ایک بچہ کی طرح یوں ہی اچھل کر دیکھو

بوجھ لگتا ہے یہ جیون بھی تو مشکل ہو کر

تھوڑا تھوڑا ہی سہی خود کو سرل کر دیکھو

خواب بنتا ہی رہا ہوں میں تمہارے لیکن

آج سانسوں سے مری تم بھی پگھل کر دیکھو