tum takabbur se kisi roz nikal kar dekho

tum takabbur se kisī roz nikal kar dekho

apnī nafrat ko mohabbat meñ badal kar dekho

ro bhī saktā hai gale lag ke tumhārā dushman

tum 'adāvat ko miTāne kī pahal kar dekho

apnī himmat se hī tārīḳh badal doge tum

zahr detī hai ye duniyā to nigal kar dekho

laḌkhaḌāne ke bahāne to hazāroñ hoñge

tum ko chalnā hai to apne se sañbhal kar dekho

apnī uljhan ko zarā der kināre rakh kar

ek bachche kī tarah yūñhī uchhal kar dekho

bojh lagtā hai ye jīvan bhī to mushkil ho kar

thoḌā thoḌā hī sahī ḳhud ko saral kar dekho

ḳhvāb buntā hī rahā huuñ maiñ tumhāre lekin

aaj sāñsoñ se mirī tum bhī pighal kar dekho

tum takabbur se kisi roz nikal kar dekho

apni nafrat ko mohabbat mein badal kar dekho

ro bhi sakta hai gale lag ke tumhaara dushman

tum 'adawat ko miTane ki pahal kar dekho

apni himmat se hi tariKH badal doge tum

zahr deti hai ye duniya to nigal kar dekho

laDkhaDane ke bahane to hazaron honge

tum ko chalna hai to apne se sanbhal kar dekho

apni uljhan ko zara der kinare rakh kar

ek bachche ki tarah yunhi uchhal kar dekho

bojh lagta hai ye jiwan bhi to mushkil ho kar

thoDa thoDa hi sahi KHud ko saral kar dekho

KHwab bunta hi raha hun main tumhaare lekin

aaj sanson se meri tum bhi pighal kar dekho