tum the KHuda tha aur mujassam dua tha main

tum the ḳhudā thā aur mujassam duā thā maiñ

yūñhī tumhāre naam na likkhā gayā thā maiñ

ḳhvāhish ke phailte hue manzar meñ tum hī tum

jazboñ ke ik hisār meñ simTā huā thā maiñ

kuchh ye bhī thā ki tum ne mujhe āsmāñ kiyā

kuchh yuuñ bhī thā ki ḳhud meñ kahīñ kho gayā thā maiñ

tum ne hī naqsh naqsh kiyā har lakīr ko

varna ḳhud apne ruup kahāñ jāntā thā maiñ

ik tum hī jānte the mirī saarī ādateñ

be-sāḳhta mizāj thā kab sochtā thā maiñ

maiñ tum ko dekhtā thā kisī aur ruup meñ

vahshat-zada the ḳhvāb magar dekhtā thā maiñ

phir tum bhī ho ga.e mire maazī kā ek baab

phir qasr-e-e'tibār meñ tanhā khaḌā thā maiñ

tum the KHuda tha aur mujassam dua tha main

yunhi tumhaare nam na likkha gaya tha main

KHwahish ke phailte hue manzar mein tum hi tum

jazbon ke ek hisar mein simTa hua tha main

kuchh ye bhi tha ki tum ne mujhe aasman kiya

kuchh yun bhi tha ki KHud mein kahin kho gaya tha main

tum ne hi naqsh naqsh kiya har lakir ko

warna KHud apne rup kahan jaanta tha main

ek tum hi jaante the meri sari aadaten

be-saKHta mizaj tha kab sochta tha main

main tum ko dekhta tha kisi aur rup mein

wahshat-zada the KHwab magar dekhta tha main

phir tum bhi ho gae mere mazi ka ek bab

phir qasr-e-e'tibar mein tanha khaDa tha main