tum to kahte the ki jhagDe mein hua kuchh bhi nahin

tum to kahte the ki jhagḌe meñ huā kuchh bhī nahīñ

maiñ ne dekhā hai ki bastī meñ rahā kuchh bhī nahīñ

ḳhirman-e-hosh-o-ḳhirad jal ga.e insānoñ ke

un kā da.avā hai fasādoñ meñ jalā kuchh bhī nahīñ

uf vo hālāt se sahmī huī bebas laḌkī

sar jhukā.e hue kahtī hai luTā kuchh bhī nahīñ

maslahat-koshī kī qaiñchī jo chalī ḳhabroñ par

shaa.e aḳhbār hue un meñ chhupā kuchh bhī nahīñ

is liye ho ga.ī zarḳhez jarā.em kī zamīñ

mujrimoñ ke liye duniyā meñ sazā kuchh bhī nahīñ

jo ye kahte haiñ ahinsā kī zamīñ hai bhārat

un kī āñkhoñ meñ to sapnoñ ke sivā kuchh bhī nahīñ

ab hasīñ chehroñ pe miltī hai tasanño kī naqāb

ġhamza-o-ishva-o-andāz-o-adā kuchh bhī nahīñ

aisā badlā hai zamāne kā chalan ai hamdam

pyaar nāpaid huā mehr-o-vafā kuchh bhī nahīñ

jaane kyoñ tīr-e-sitam chalte haiñ ham par 'bebāk'

apnā maslak to mohabbat ke sivā kuchh bhī nahīñ

tum to kahte the ki jhagDe mein hua kuchh bhi nahin

main ne dekha hai ki basti mein raha kuchh bhi nahin

KHirman-e-hosh-o-KHirad jal gae insanon ke

un ka dawa hai fasadon mein jala kuchh bhi nahin

uf wo haalat se sahmi hui bebas laDki

sar jhukae hue kahti hai luTa kuchh bhi nahin

maslahat-koshi ki qainchi jo chali KHabron par

shae aKHbar hue un mein chhupa kuchh bhi nahin

is liye ho gai zarKHez jaraem ki zamin

mujrimon ke liye duniya mein saza kuchh bhi nahin

jo ye kahte hain ahinsa ki zamin hai bhaarat

un ki aankhon mein to sapnon ke siwa kuchh bhi nahin

ab hasin chehron pe milti hai tasanno ki naqab

ghamza-o-ishwa-o-andaz-o-ada kuchh bhi nahin

aisa badla hai zamane ka chalan ai hamdam

pyar napaid hua mehr-o-wafa kuchh bhi nahin

jaane kyon tir-e-sitam chalte hain hum par 'bebak'

apna maslak to mohabbat ke siwa kuchh bhi nahin