تم تو کہتے تھے کہ جھگڑے میں ہوا کچھ بھی نہیں

تم تو کہتے تھے کہ جھگڑے میں ہوا کچھ بھی نہیں

میں نے دیکھا ہے کہ بستی میں رہا کچھ بھی نہیں

خرمن ہوش و خرد جل گئے انسانوں کے

ان کا دعویٰ ہے فسادوں میں جلا کچھ بھی نہیں

اف وہ حالات سے سہمی ہوئی بے بس لڑکی

سر جھکائے ہوئے کہتی ہے لٹا کچھ بھی نہیں

مصلحت کوشی کی قینچی جو چلی خبروں پر

شائع اخبار ہوئے ان میں چھپا کچھ بھی نہیں

اس لئے ہو گئی زرخیز جرائم کی زمیں

مجرموں کے لئے دنیا میں سزا کچھ بھی نہیں

جو یہ کہتے ہیں اہنسا کی زمیں ہے بھارت

ان کی آنکھوں میں تو سپنوں کے سوا کچھ بھی نہیں

اب حسیں چہروں پہ ملتی ہے تصنع کی نقاب

غمزہ و عشوہ و انداز و ادا کچھ بھی نہیں

ایسا بدلا ہے زمانے کا چلن اے ہمدم

پیار ناپید ہوا مہر و وفا کچھ بھی نہیں

جانے کیوں تیر ستم چلتے ہیں ہم پر ببیاکؔ

اپنا مسلک تو محبت کے سوا کچھ بھی نہیں