تم تو ٹھکرا کے گئے دور تمہیں کیا معلوم

تم تو ٹھکرا کے گئے دور تمہیں کیا معلوم

ہو گیا شیشۂ دل چور تمہیں کیا معلوم

اشک آ جاتے ہیں آنکھوں میں تو کیا میرا قصور

درد دل کرتا ہے مجبور تمہیں کیا معلوم

مسکراہٹ ہی تو ہوتی نہیں عشرت کی دلیل

کیا تبسم میں ہے مستور تمہیں کیا معلوم

مجھ پہ کیا کیا نہ زمانے نے ستم توڑ دیے

تم تو مجھ سے ہو بہت دور تمہیں کیا معلوم

تم کو کیا تم تو ہو حلقے میں مہ و انجم کے

زندگی کس کی ہے بے نور تمہیں کیا معلوم

اس کے کھنڈرات ہی تم آ کے ذرا دیکھ تو لو

شہر دل میرا تھا مشہور تمہیں کیا معلوم

پھینکتا کیسے نہیں کیسے لگاتا منہ سے

جام تھا زہر سے بھرپور تمہیں کیا معلوم

تم سمجھتے ہو کہ پیتا ہے بہت اب تشنہؔ

وہ مئے غم سے ہے مخمور تمہیں کیا معلوم