tum to Thukra ke gae dur tumhein kya malum

tum to Thukrā ke ga.e duur tumheñ kyā ma.alūm

ho gayā shīsha-e-dil chuur tumheñ kyā ma.alūm

ashk aa jaate haiñ āñkhoñ meñ to kyā merā qusūr

dard-e-dil kartā hai majbūr tumheñ kyā ma.alūm

muskurāhaT hī to hotī nahīñ ishrat kī dalīl

kyā tabassum meñ hai mastūr tumheñ kyā ma.alūm

mujh pe kyā kyā na zamāne ne sitam toḌ diye

tum to mujh se ho bahut duur tumheñ kyā ma.alūm

tum ko kyā tum to ho halqe meñ mah-o-anjum ke

zindagī kis kī hai be-nūr tumheñ kyā ma.alūm

is ke khañDarāt hī tum aa ke zarā dekh to lo

shahr-e-dil merā thā mash.hūr tumheñ kyā ma.alūm

pheñktā kaise nahīñ kaise lagātā muñh se

jaam thā zahr se bharpūr tumheñ kyā ma.alūm

tum samajhte ho ki piitā hai bahut ab 'tishna'

vo mai-e-ġham se hai maḳhmūr tumheñ kyā ma.alūm

tum to Thukra ke gae dur tumhein kya malum

ho gaya shisha-e-dil chur tumhein kya malum

ashk aa jate hain aankhon mein to kya mera qusur

dard-e-dil karta hai majbur tumhein kya malum

muskurahaT hi to hoti nahin ishrat ki dalil

kya tabassum mein hai mastur tumhein kya malum

mujh pe kya kya na zamane ne sitam toD diye

tum to mujh se ho bahut dur tumhein kya malum

tum ko kya tum to ho halqe mein mah-o-anjum ke

zindagi kis ki hai be-nur tumhein kya malum

is ke khanDaraat hi tum aa ke zara dekh to lo

shahr-e-dil mera tha mashhur tumhein kya malum

phenkta kaise nahin kaise lagata munh se

jam tha zahr se bharpur tumhein kya malum

tum samajhte ho ki pita hai bahut ab 'tishna'

wo mai-e-gham se hai maKHmur tumhein kya malum