tum wafa ka ewaz jafa samjhe

tum vafā kā evaz jafā samjhe

ai buto tum se bas ḳhudā samjhe

paan khā kar jo aa.e maqtal meñ

kyā shahīdoñ kā ḳhūn-bahā samjhe

sar qalam karne kā thā ḳhat meñ jo haal

us kā mazmūn ham judā samjhe

kab vo talvoñ se āñkheñ malne de

jo ki mizhgāñ ko ḳhār-e-pā samjhe

ho gayā jab qalam hamārā sar

apnī qismat kā tab likhā samjhe

dauḌe kyā ho ke ḳhush sū-e-maqtal

us ke ham ghar kā rāsta samjhe

kisī sūrat se ham ko aane de

kaash darvāze kā gadā samjhe

yād-e-dandāñ meñ jo bahā aañsū

us ko ham durr-e-be-bahā samjhe

chāñdnī par vo phir rakhe na qadam

ham faqīroñ kā boriyā samjhe

terī abrū ko jo hilāl kahā

māh-e-nau se bhī kuchh sivā samjhe

marūñ to vo javāb-e-nāma likhe

ḳhat na aane kā mudda.ā samjhe

haath uThā kar lagā jo kosne vo

vaah re ham use duā samjhe

jo hai begāna āshnā hai vo

ham jo kahte haiñ koī kyā samjhe

ham ko nazroñ se pīstī haiñ aap

chashm-e-bad duur tūtiyā samjhe

jab se us kūche meñ qadam rakkhā

kīmiyā ko bhī ḳhāk-e-pā samjhe

tujh ko o naujavāñ kahā be-misl

aaj ma.anī-e-lā-fatā samjhe

ham ne jab dekhī chāñdnī chhiTkī

terī utrī huī qabā samjhe

kāsa-e-māh jab se dekh liyā

tab se gardūñ ko ham gadā samjhe

apne fahmīd pūchh mat 'goyā'

kuchh na samjhe ye bārhā samjhe

tum wafa ka ewaz jafa samjhe

ai buto tum se bas KHuda samjhe

pan kha kar jo aae maqtal mein

kya shahidon ka KHun-baha samjhe

sar qalam karne ka tha KHat mein jo haal

us ka mazmun hum juda samjhe

kab wo talwon se aankhen malne de

jo ki mizhgan ko KHar-e-pa samjhe

ho gaya jab qalam hamara sar

apni qismat ka tab likha samjhe

dauDe kya ho ke KHush su-e-maqtal

us ke hum ghar ka rasta samjhe

kisi surat se hum ko aane de

kash darwaze ka gada samjhe

yaad-e-dandan mein jo baha aansu

us ko hum durr-e-be-baha samjhe

chandni par wo phir rakhe na qadam

hum faqiron ka boriya samjhe

teri abru ko jo hilal kaha

mah-e-nau se bhi kuchh siwa samjhe

marun to wo jawab-e-nama likhe

KHat na aane ka muddaa samjhe

hath uTha kar laga jo kosne wo

wah re hum use dua samjhe

jo hai begana aashna hai wo

hum jo kahte hain koi kya samjhe

hum ko nazron se pisti hain aap

chashm-e-bad dur tutiya samjhe

jab se us kuche mein qadam rakkha

kimiya ko bhi KHak-e-pa samjhe

tujh ko o naujawan kaha be-misl

aaj mani-e-la-fata samjhe

hum ne jab dekhi chandni chhiTki

teri utri hui qaba samjhe

kasa-e-mah jab se dekh liya

tab se gardun ko hum gada samjhe

apne fahmid puchh mat 'goya'

kuchh na samjhe ye barha samjhe