tum waqt-e-sahar rauzan-e-diwar mein dekho

tum vaqt-e-sahar rauzan-e-dīvār meñ dekho

laalī sī kahīñ sub.h ke āsār meñ dekho

har jins kī qīmat hai mire sar se ziyāda

ruk kar to kabhī kūcha o bāzār meñ dekho

thak-hār ke sīkhe haiñ masāfat ke qarīne

ik taaza safar sāya-e-dīvār meñ dekho

ye atlas o kim-ḳhvāb mirā asl nahīñ haiñ

milnā ho to mujh ko mire pindār meñ dekho

ab jurm hai ham-sā.e kā ham-sā.e se milnā

ye taaza ḳhabar aaj ke aḳhbār meñ dekho

maiñ niiñd meñ chaltā huā kho jā.ūñ na 'qaisar'

aahaT mire qadmoñ kī shab-e-tār meñ dekho

tum waqt-e-sahar rauzan-e-diwar mein dekho

lali si kahin subh ke aasar mein dekho

har jins ki qimat hai mere sar se ziyaada

ruk kar to kabhi kucha o bazar mein dekho

thak-haar ke sikhe hain masafat ke qarine

ek taza safar saya-e-diwar mein dekho

ye atlas o kim-KHwab mera asl nahin hain

milna ho to mujh ko mere pindar mein dekho

ab jurm hai ham-sae ka ham-sae se milna

ye taza KHabar aaj ke aKHbar mein dekho

main nind mein chalta hua kho jaun na 'qaisar'

aahaT mere qadmon ki shab-e-tar mein dekho