تم وطن چھوڑ کے گھر بار کہاں جاؤ گے

تم وطن چھوڑ کے گھر بار کہاں جاؤ گے

توڑ دو وقت کی دیوار کہاں جاؤ گے

مسئلہ قوم کا ہے اور قیادت ناداں

ساتھ گر چھوڑ دے سردار کہاں جاؤ گے

شۓ مفقود ہے ڈھونڈے سے نہیں ملتا ہے

آج کل جذبۂ ایثار کہاں جاؤ گے

چار سو آگ برستی ہے زمیں پر دیکھو

پھر برہنہ بھی ہیں اشجار کہاں جاؤ گے

سادگی سے نہیں پڑھ پاؤ گے احوال جنوں

سرخ ہے خون سے اخبار کہاں جاؤ گے

کاغذی ناؤ ہے دریا کا تلاطم توبہ

ٹوٹ گر جائے تو پتوار کہاں جاؤ گے

پاس رشتہ نہیں اس دشت میں ثاقبؔ صاحب

نہ تو اپنے ہیں نہ اغیار کہاں جاؤ گے