tumhaara dil to hamare subhaw jaisa hai

tumhārā dil to hamāre subhāv jaisā hai

haTā ke chehre se chehra dikhāo jaisā hai

vo chūktā hī nahīñ jis pe daav jaisā hai

hameñ ḳhabar hai vahāñ rakh-rakhāv jaisā hai

mujhe dhakel kar us kā zamīr jaag uThā

ab us kā haal bhī tūfāñ meñ naav jaisā hai

to kyā vo dast-e-mashiyyat kā shāhkār nahīñ

purānā yaar hai yaaro nibhāo jaisā hai

sunahre ḳhvāb dikhā.e na aap hī dekhe

hamārā yaar hamāre subhāv jaisā hai

ubhar rahī haiñ na.e ḳhuun meñ na.ī qadreñ

ḳhulūs meñ bhī ghumāo phirāv jaisā hai

ye aur baat ki dam de rahā ho soz-e-darūñ

bujhā huā vo ba-zāhir alaav jaisā hai

khulegā ḳhud vo kisī roz misl-e-band-e-qabā

na chhup sakegā lahū meñ rachāv jaisā hai

vo us kā hāl-e-zabūñ us pe ḳhanda-e-be-bāk

hasīñ samāj ke chehre pe ghaav jaisā hai

hai apnī piiTh kā har zaḳhm aa.ina 'ġhausī'

mire rafīqoñ ko mujh se lagāv jaisā hai

tumhaara dil to hamare subhaw jaisa hai

haTa ke chehre se chehra dikhao jaisa hai

wo chukta hi nahin jis pe daw jaisa hai

hamein KHabar hai wahan rakh-rakhaw jaisa hai

mujhe dhakel kar us ka zamir jag uTha

ab us ka haal bhi tufan mein naw jaisa hai

to kya wo dast-e-mashiyyat ka shahkar nahin

purana yar hai yaro nibhao jaisa hai

sunahre KHwab dikhae na aap hi dekhe

hamara yar hamare subhaw jaisa hai

ubhar rahi hain nae KHun mein nai qadren

KHulus mein bhi ghumao phiraw jaisa hai

ye aur baat ki dam de raha ho soz-e-darun

bujha hua wo ba-zahir alaw jaisa hai

khulega KHud wo kisi roz misl-e-band-e-qaba

na chhup sakega lahu mein rachaw jaisa hai

wo us ka haal-e-zabun us pe KHanda-e-be-bak

hasin samaj ke chehre pe ghaw jaisa hai

hai apni piTh ka har zaKHm aaina 'ghausi'

mere rafiqon ko mujh se lagaw jaisa hai