tumhaara husn asar ke siwa kuchh aur nahin

tumhārā husn asar ke sivā kuchh aur nahīñ

hamārā zauq nazar ke sivā kuchh aur nahīñ

na kam ho kaash ye soz-e-jigar qayāmat tak

ki ishq soz-e-jigar ke sivā kuchh aur nahīñ

matā.a-e-sīna-e-ahl-e-nazar haiñ chand aañsū

sadaf ke paas guhar ke sivā kuchh aur nahīñ

hamārī sub.h kā aalam tamām-e-dard-o-firāq

tumhārī sub.h sahar ke sivā kuchh aur nahīñ

banā sakegī mohabbat hī jāvedāñ us ko

hayāt raqs-e-sharar ke sivā kuchh aur nahīñ

hudūd-e-dair-o-haram meñ sukūn-e-dil mālūm

yahāñ to naf-o-zarar ke sivā kuchh aur nahīñ

'bashīr' manzil-e-hastī se dil pareshāñ hai

chalo ki chāra safar ke sivā kuchh aur nahīñ

tumhaara husn asar ke siwa kuchh aur nahin

hamara zauq nazar ke siwa kuchh aur nahin

na kam ho kash ye soz-e-jigar qayamat tak

ki ishq soz-e-jigar ke siwa kuchh aur nahin

mataa-e-sina-e-ahl-e-nazar hain chand aansu

sadaf ke pas guhar ke siwa kuchh aur nahin

hamari subh ka aalam tamam-e-dard-o-firaq

tumhaari subh sahar ke siwa kuchh aur nahin

bana sakegi mohabbat hi jawedan us ko

hayat raqs-e-sharar ke siwa kuchh aur nahin

hudud-e-dair-o-haram mein sukun-e-dil malum

yahan to naf-o-zarar ke siwa kuchh aur nahin

'bashir' manzil-e-hasti se dil pareshan hai

chalo ki chaara safar ke siwa kuchh aur nahin