tumhaara ishq jab se kya hua ai naznin hum ko

tumhārā ishq jab se kyā huā ai nāznīñ ham ko

pasand aatā nahīñ hai koī bhī ab mah-jabīñ ham ko

kiyā iz.hār jab ham ne ġham-e-furqat to vo bole

tumhāre kahne kā hotā nahīñ hai kuchh yaqīñ ham ko

pas-e-murdan pa-e-pāmāl goristāñ meñ phirte haiñ

nishān-e-turbat-e-ushshāq mil jaa.e kahīñ ham ko

butān-e-sang-dil se kyā ho ummīd-e-vafā ai dil

jahāñ meñ DhūñD baiThe kuchh pata miltā nahīñ ham ko

na jaa.eñ mar ke vo haiñ āshiq-e-jāñbāz ai hamdam

tire kūche meñ gar mil jaa.e thoḌī sī zamīñ ham ko

tire dar par khaḌe haiñ diid ko ham ek muddat se

dikhā de shakl-e-nūrānī ab ai parda-nashīñ ham ko

'azīz'-e-zār gar ishq-e-butāñ meñ ye rahī sūrat

kisī din maar Dālegā dil-e-andoh-gīñ ham ko

tumhaara ishq jab se kya hua ai naznin hum ko

pasand aata nahin hai koi bhi ab mah-jabin hum ko

kiya izhaar jab hum ne gham-e-furqat to wo bole

tumhaare kahne ka hota nahin hai kuchh yaqin hum ko

pas-e-murdan pa-e-pamal goristan mein phirte hain

nishan-e-turbat-e-ushshaq mil jae kahin hum ko

butan-e-sang-dil se kya ho ummid-e-wafa ai dil

jahan mein DhunD baiThe kuchh pata milta nahin hum ko

na jaen mar ke wo hain aashiq-e-jaanbaz ai hamdam

tere kuche mein gar mil jae thoDi si zamin hum ko

tere dar par khaDe hain did ko hum ek muddat se

dikha de shakl-e-nurani ab ai parda-nashin hum ko

'aziz'-e-zar gar ishq-e-butan mein ye rahi surat

kisi din mar Dalega dil-e-andoh-gin hum ko