tumhaare aane se manzar ka yun badal jaana

tumhāre aane se manzar kā yuuñ badal jaanā

na.e qarīne meñ har shai kā ḳhud hī Dhal jaanā

takallufāt sab apnī jagah magar phir bhī

jo dil ko toḌ ke jaanā hī hai to kal jaanā

jo baat maiñ kisī sūrat bhī kah na saktā thā

laboñ se mere usī baat kā phisal jaanā

chamakte din meñ Thaharnā na dil kisī shai par

añdherī raat meñ jugnū se jī bahal jaanā

nikalnā ghar se na bāhar kisī bhī qīmat par

magar jo aa paḌe ḳhud par to sar ke bal jaanā

zarā sā pā ke ishāra laboñ kī jumbish se

bilā sabab dil-e-betāb kā machal jaanā

na jaane kyoñ tujhe sūraj kī fikr hai 'tanhā'

ḳhud apnī aag meñ ishrat hai us kī jal jaanā

tumhaare aane se manzar ka yun badal jaana

nae qarine mein har shai ka KHud hi Dhal jaana

takallufat sab apni jagah magar phir bhi

jo dil ko toD ke jaana hi hai to kal jaana

jo baat main kisi surat bhi kah na sakta tha

labon se mere usi baat ka phisal jaana

chamakte din mein Thaharna na dil kisi shai par

andheri raat mein jugnu se ji bahal jaana

nikalna ghar se na bahar kisi bhi qimat par

magar jo aa paDe KHud par to sar ke bal jaana

zara sa pa ke ishaara labon ki jumbish se

bila sabab dil-e-betab ka machal jaana

na jaane kyon tujhe suraj ki fikr hai 'tanha'

KHud apni aag mein ishrat hai us ki jal jaana