tumhaare dekhne ko hasrat-e-hairat-faza Thahri

tumhāre dekhne ko hasrat-e-hairat-fazā Thahrī

dil-e-mahzūñ se niklī dīda-e-bismil meñ aa Thahrī

tasavvur yaar kā thā sāmne aatī qazā kyuuñ kar

sar-e-bālīñ dam-e-murdan ba-shakl-e-dil-rubā Thahrī

jhukāyā bār-e-isyāñ ne hamāre dast-e-hasrat ko

pahuñch kar tā-ba-lab jis kī nadāmat se duā Thahrī

tumhārī jumbish-e-abrū se ghāyal ho ga.e āshiq

ban aa.ī jaan par un kī tumhārī ik adā Thahrī

usī andāz ne vīrāñ kiyā hai mere pahlū ko

dil-e-āshiq ke lene ko in āñkhoñ meñ ziyā Thahrī

sabā ke tez jhoñkoñ ne phirāyā dar-ba-dar us ko

zamīñ par chain se kis dam ye ḳhāk-e-mubtalā Thahrī

jalāyā muskurā kar aur adā se kar diyā murda

kahīñ to ye jafā Thahrī kisī jā par vafā Thahrī

basān-e-ḳhūn-e-dil chaspāñ huī hai tere talvoñ se

hamārī dushman-e-jāñ ab ye shoḳhī-e-ziyā Thahrī

ilāhī kyā mire dilbar ne kholā apne gesū ko

mashām-e-jāñ meñ apne aa ke bū-e-jāñ-fizā Thahrī

tumhārī bad-duā se lutf miltā hai mire dil ko

maiñ āshiq huuñ tumhārā vo mire haq meñ duā Thahrī

farishtoñ ne pukārā ai 'jamīla' jald hāzir ho

ḳhudā ke rū-ba-rū aa kar saf-e-ahl-e-safā Thahrī

tumhaare dekhne ko hasrat-e-hairat-faza Thahri

dil-e-mahzun se nikli dida-e-bismil mein aa Thahri

tasawwur yar ka tha samne aati qaza kyun kar

sar-e-baalin dam-e-murdan ba-shakl-e-dil-ruba Thahri

jhukaya bar-e-isyan ne hamare dast-e-hasrat ko

pahunch kar ta-ba-lab jis ki nadamat se dua Thahri

tumhaari jumbish-e-abru se ghayal ho gae aashiq

ban aai jaan par un ki tumhaari ek ada Thahri

usi andaz ne viran kiya hai mere pahlu ko

dil-e-ashiq ke lene ko in aankhon mein ziya Thahri

saba ke tez jhonkon ne phiraya dar-ba-dar us ko

zamin par chain se kis dam ye KHak-e-mubtala Thahri

jalaya muskura kar aur ada se kar diya murda

kahin to ye jafa Thahri kisi ja par wafa Thahri

basan-e-KHun-e-dil chaspan hui hai tere talwon se

hamari dushman-e-jaan ab ye shoKHi-e-ziya Thahri

ilahi kya mere dilbar ne khola apne gesu ko

masham-e-jaan mein apne aa ke bu-e-jaan-fiza Thahri

tumhaari bad-dua se lutf milta hai mere dil ko

main aashiq hun tumhaara wo mere haq mein dua Thahri

farishton ne pukara ai 'jamila' jald hazir ho

KHuda ke ru-ba-ru aa kar saf-e-ahl-e-safa Thahri