تمہارے ہجر کا منظر تمام سامنے ہے

تمہارے ہجر کا منظر تمام سامنے ہے

اب اپنی عمر رواں کی جو شام سامنے ہے

یہ عشق ایک سفر ہے خلاؤں کا جس میں

نہ منزلیں ہیں نہ کوئی مقام سامنے ہے

مجھے یہ لگتا ہے ہر بار دیکھ کر دنیا

کہ جیسے کوئی ادھورا سا کام سامنے ہے

سخن پہ اپنے ہمیں یوں تو ہے یقین بہت

پر اب کی بار کوئی خوش کلام سامنے ہے

جواب یوں تو زمانہ کے ہر سوال کا ہے

مگر میں چپ ہوں کہ اب تیرا نام سامنے ہے

دلوں کے راز نہیں کھولتے ہیں دنیا پر

رہو خموش کہ ہر خاص عام سامنے ہے