tumhaare husn ki tasKHir aam hoti hai

tumhāre husn kī tasḳhīr aam hotī hai

ki ik nigāh meñ duniyā tamām hotī hai

jahāñ pe jalva-e-jānāñ hai anjuman-ārā

vahāñ nigāh kī manzil tamām hotī hai

vahī ḳhalish vahī sozish vahī tapish vahī dard

hameñ sahar bhī ba-andāz-e-shām hotī hai

nigāh-e-husn mubārak tujhe dar-andāzī

kabhī kabhī mirī mahfil bhī aam hotī hai

zahe nasīb meñ qurbān apnī qismat ke

tire liye mirī duniyā tamām hotī hai

namāz-e-ishq kā hai inhisār ashkoñ tak

ye be-niyāz-e-sujūd-o-qayām hotī hai

tirī nigāh ke qurbāñ tirī nigāh kī Tiis

ye nā-tamām hī rah kar tamām hotī hai

vahāñ pe chal mujhe le kar mire samand-e-ḳhayāl

jahāñ nigāh kī mastī harām hotī hai

kisī ke zikr se 'bahzād' mubtalā ab tak

jigar meñ ik ḳhalish-e-nā-tamām hotī hai

tumhaare husn ki tasKHir aam hoti hai

ki ek nigah mein duniya tamam hoti hai

jahan pe jalwa-e-jaanan hai anjuman-ara

wahan nigah ki manzil tamam hoti hai

wahi KHalish wahi sozish wahi tapish wahi dard

hamein sahar bhi ba-andaz-e-sham hoti hai

nigah-e-husn mubarak tujhe dar-andazi

kabhi kabhi meri mahfil bhi aam hoti hai

zahe nasib mein qurban apni qismat ke

tere liye meri duniya tamam hoti hai

namaz-e-ishq ka hai inhisar ashkon tak

ye be-niyaz-e-sujud-o-qayam hoti hai

teri nigah ke qurban teri nigah ki Tis

ye na-tamam hi rah kar tamam hoti hai

wahan pe chal mujhe le kar mere samand-e-KHayal

jahan nigah ki masti haram hoti hai

kisi ke zikr se 'bahzad' mubtala ab tak

jigar mein ek KHalish-e-na-tamam hoti hai