tumhaare jism ka saya paDa nahin hoga

tumhāre jism kā saaya paḌā nahīñ hogā

dayār-e-ġham meñ ujālā huā nahīñ hogā

zarā sī baat samajhne meñ ek umr lagī

vo ḳhud-parast hai vo bā-vafā nahīñ hogā

bahut ḳhamosh-nafas thā guzarne vaalā bhī

so us kī maut kā shohra huā nahīñ hogā

tire ḳhayāl kā bādal baras gayā thā vahāñ

so jism-o-jān kā sahrā tapā nahīñ hogā

use yaqīn hai kitnā ki us ke jaane se

koī bhī shaḳhs akelā huā nahīñ hogā

ye ho bhī saktā hai duniyā kā koī mālik ho

magar ye tai hai kitābī ḳhudā nahīñ hogā

jo us ko qatl kiyā us ke chārasāzoñ ne

'junūñ' ke dard kā darmāñ huā nahīñ hogā

tumhaare jism ka saya paDa nahin hoga

dayar-e-gham mein ujala hua nahin hoga

zara si baat samajhne mein ek umr lagi

wo KHud-parast hai wo ba-wafa nahin hoga

bahut KHamosh-nafas tha guzarne wala bhi

so us ki maut ka shohra hua nahin hoga

tere KHayal ka baadal baras gaya tha wahan

so jism-o-jaan ka sahra tapa nahin hoga

use yaqin hai kitna ki us ke jaane se

koi bhi shaKHs akela hua nahin hoga

ye ho bhi sakta hai duniya ka koi malik ho

magar ye tai hai kitabi KHuda nahin hoga

jo us ko qatl kiya us ke chaarasazon ne

'junun' ke dard ka darman hua nahin hoga