tumhaare lab pe mera nam KHwab lagta hai

tumhāre lab pe merā naam ḳhvāb lagtā hai

magar ye lamha baḌā kāmyāb lagtā hai

maiñ apne yaar kī tāb-o-tapish batā.ūñ kyā

zamīñ pe utrā huā āftāb lagtā hai

mahak to hai hī nahīñ rang bhī ubūrī haiñ

vo dekhne meñ sabhī ko gulāb lagtā hai

bhale ke kaam to ham karte rahte haiñ lekin

na jaane kisī ko hamārā savāb lagtā hai

tū chāhtā hai ki ākāsh aa.e dhartī par

tirā savāl mujhe lā-javāb lagtā hai

vo rāhbar hai vahī rāsta dikhā.egā

bhaTakte rahnā hameñ bhī ḳharāb lagtā hai

maiñ us ko sūrat-e-ḳhargāh-o-ḳhema huuñ 'ulfat'

mirā sanam mujhe misl-e-tanāb lagtā hai

tumhaare lab pe mera nam KHwab lagta hai

magar ye lamha baDa kaamyab lagta hai

main apne yar ki tab-o-tapish bataun kya

zamin pe utra hua aaftab lagta hai

mahak to hai hi nahin rang bhi uburi hain

wo dekhne mein sabhi ko gulab lagta hai

bhale ke kaam to hum karte rahte hain lekin

na jaane kisi ko hamara sawab lagta hai

tu chahta hai ki aakash aae dharti par

tera sawal mujhe la-jawab lagta hai

wo rahbar hai wahi rasta dikhaega

bhaTakte rahna hamein bhi KHarab lagta hai

main us ko surat-e-KHargah-o-KHema hun 'ulfat'

mera sanam mujhe misl-e-tanab lagta hai