tumhaare pahlu mein zindagi ne jo sans li thi wo mar chuki hai

tumhāre pahlū meñ zindagī ne jo saañs lī thī vo mar chukī hai

jo dasht meñ merī ham-safar thī vo ret āñkhoñ meñ bhar chukī hai

'ajab ravayya hai jangaloñ kā 'ajab ravish hai shikāriyoñ kī

Thumak Thumak kar havā jo chaltī thī ban meñ ab vo bhī Dar chukī hai

vo kis sitāre kī justujū meñ hazār rātoñ se jāgte haiñ

koī to batlā.e rāhiboñ ko shab-e-sitāra guzar chukī hai

maiñ kahkashāoñ kā ham-safar huuñ maiñ chāñd tāroñ kā rāhbar huuñ

mire taḳhayyul kī tashtarī to mirīḳh par bhī utar chukī hai

anaaj lekar du'ā.eñ dene ab aa rahe ho faqīr baabā

hamārī bastī jab apnā māl-o-manāl paanī pe dhar chukī hai

jo barbariyyat ke murtakib haiñ zamīñ pe ab bhī vo mohtasib haiñ

ḳhudā ke aage falak pe ḳhilqat kī aah mātam bhī kar chukī hai

zamīn-zāde zamīn-zādoñ pe aap hī qahr Dah rahe haiñ

hayāt insāñ kī is liye to ujaḌ chukī hai bikhar chukī hai

na sabr se jabr hārtā hai na ḳhair detī hai maat shar ko

samīm jitne haiñ dar-ba-dar haiñ badoñ kī duniyā sañvar chukī hai

maiñ kyā batā.ūñ ki kaisā mard-e-‘amal hai madfan meñ dafn 'vāsif'

lahad ke ruḳh par vo dekh mayyat kī apnī sūrat ubhar chukī hai

tumhaare pahlu mein zindagi ne jo sans li thi wo mar chuki hai

jo dasht mein meri ham-safar thi wo ret aankhon mein bhar chuki hai

'ajab rawayya hai jangalon ka 'ajab rawish hai shikariyon ki

Thumak Thumak kar hawa jo chalti thi ban mein ab wo bhi Dar chuki hai

wo kis sitare ki justuju mein hazar raaton se jagte hain

koi to batlae rahibon ko shab-e-sitara guzar chuki hai

main kahkashaon ka ham-safar hun main chand taron ka rahbar hun

mere taKHayyul ki tashtari to miriKH par bhi utar chuki hai

anaj lekar du'aen dene ab aa rahe ho faqir baba

hamari basti jab apna mal-o-manal pani pe dhar chuki hai

jo barbariyyat ke murtakib hain zamin pe ab bhi wo mohtasib hain

KHuda ke aage falak pe KHilqat ki aah matam bhi kar chuki hai

zamin-zade zamin-zadon pe aap hi qahr Dah rahe hain

hayat insan ki is liye to ujaD chuki hai bikhar chuki hai

na sabr se jabr haarta hai na KHair deti hai mat shar ko

samim jitne hain dar-ba-dar hain badon ki duniya sanwar chuki hai

main kya bataun ki kaisa mard-e-‘amal hai madfan mein dafn 'wasif'

lahad ke ruKH par wo dekh mayyat ki apni surat ubhar chuki hai