tumhaare shahr mein tha bhi to ek musafir main

tumhāre shahr meñ thā bhī to ik musāfir maiñ

so thak ke baiTh gayā rāste meñ āḳhir maiñ

maiñ har lihāz se sairāb thā ḳhudā kī qasam

ye aur baat ki pyāsā rahā ba-zāhir maiñ

hurūf milte hī āvāz Duub jaatī hai

jo chup rahūñ na batāo to kyā karūñ phir maiñ

kisī bhī samt bhaTaktā phirūñ yamīn-o-yasār

talāsh raah karūñ bhī to kis kī ḳhātir maiñ

mirī ḳhushī ko yahī rabt bāhamī hai bahut

mirā muġhannī hai vo aur us kā shā'ir maiñ

ye khel ḳhatm banā hār-jīt ke hogā

ki jis hunar meñ vo yaktā usī meñ māhir maiñ

hazār bāñdhā gayā mujh pe ā.inoñ kā hisār

kisī pe apne 'alāva huā na zāhir maiñ

tumhaare shahr mein tha bhi to ek musafir main

so thak ke baiTh gaya raste mein aaKHir main

main har lihaz se sairab tha KHuda ki qasam

ye aur baat ki pyasa raha ba-zahir main

huruf milte hi aawaz Dub jati hai

jo chup rahun na batao to kya karun phir main

kisi bhi samt bhaTakta phirun yamin-o-yasar

talash rah karun bhi to kis ki KHatir main

meri KHushi ko yahi rabt bahami hai bahut

mera mughanni hai wo aur us ka sha'ir main

ye khel KHatm bana haar-jit ke hoga

ki jis hunar mein wo yakta usi mein mahir main

hazar bandha gaya mujh pe aainon ka hisar

kisi pe apne 'alawa hua na zahir main