tumhaare shahr mein dekhun to kya nahin milta

tumhāre shahr meñ dekhūñ to kyā nahīñ miltā

bas apne ghar ke liye rāsta nahīñ miltā

uruuj par hai na.e mausamoñ kā jāh-o-jalāl

shajar pe koī bhī patta harā nahīñ miltā

abhī abhī koī āñdhī idhar se guzrī hai

rah-e-hayāt mujhe naqsh-e-pā nahīñ miltā

bichhaḌ ke tujh se tabī.at uchāT rahtī hai

ḳhud apne ghar meñ bhī ghar kā mazā nahīñ miltā

tumheñ bhī roz kahānī vahī sunānī hai

mujhe bhī ḳhvāb koī dūsrā nahīñ miltā

matā-e-barg-o-samar bhī luTā chuke ashjār

kisī tarah bhī mizāj-e-havā nahīñ miltā

maiñ kis tarah se 'zafar' mas.aloñ ko suljhā.ūñ

kisī bhī baat kā koī sirā nahīñ miltā

tumhaare shahr mein dekhun to kya nahin milta

bas apne ghar ke liye rasta nahin milta

uruj par hai nae mausamon ka jah-o-jalal

shajar pe koi bhi patta hara nahin milta

abhi abhi koi aandhi idhar se guzri hai

rah-e-hayat mujhe naqsh-e-pa nahin milta

bichhaD ke tujh se tabiat uchaT rahti hai

KHud apne ghar mein bhi ghar ka maza nahin milta

tumhein bhi roz kahani wahi sunani hai

mujhe bhi KHwab koi dusra nahin milta

mata-e-barg-o-samar bhi luTa chuke ashjar

kisi tarah bhi mizaj-e-hawa nahin milta

main kis tarah se 'zafar' masalon ko suljhaun

kisi bhi baat ka koi sira nahin milta