tumhaare shahr mein itne makan gire kaise

tumhāre shahr meñ itne makāñ gire kaise

mire aziiz Thikāne dhuāñ hue kaise

maiñ shahr-e-jabr se guzrā to suraḳh-rū ho kar

unheñ ye fikr lahū kā nishāñ miTe kaise

sunā rahā huuñ kahānī hazār rātoñ kī

ki shāhzāde ke sar se sināñ haTe kaise

hisāb ḳhuub rakhā tum ne apnī lāgat kā

mire nisāb meñ sūd-o-ziyāñ chale kaise

har ek shaḳhs tumhārī tarah nahīñ hotā

koī kisī se mohabbat kahāñ kare kaise

jahāñ bhī shaam huī ghar banā liyā apnā

makāñ bahut the magar be-makāñ rahe kaise

'anīs' tum to bahut tez chaal chalte the

zarā hameñ bhī batāo miyāñ gire kaise

tumhaare shahr mein itne makan gire kaise

mere aziz Thikane dhuan hue kaise

main shahr-e-jabr se guzra to suraKH-ru ho kar

unhen ye fikr lahu ka nishan miTe kaise

suna raha hun kahani hazar raaton ki

ki shahzade ke sar se sinan haTe kaise

hisab KHub rakha tum ne apni lagat ka

mere nisab mein sud-o-ziyan chale kaise

har ek shaKHs tumhaari tarah nahin hota

koi kisi se mohabbat kahan kare kaise

jahan bhi sham hui ghar bana liya apna

makan bahut the magar be-makan rahe kaise

'anis' tum to bahut tez chaal chalte the

zara hamein bhi batao miyan gire kaise