tumhaare shahr se aati hui hawa ki qasam

tumhāre shahr se aatī huī havā kī qasam

tamām zaḳhm hare ho ga.e ḳhudā kī qasam

tamām jism mahakne lagā hai apne aap

badan meñ phailī huī 'ishq kī vabā kī qasam

ḳhushāmadoñ se mirā kaam ban gayā lekin

zamīr maar diyā maiñ ne iltijā kī qasam

tumheñ pukār ke ham aaj tak haiñ sharminda

tumhāre kaan se lauTī huī sadā kī qasam

agarche ibn-e-'alī kī maiñ ḳhāk-e-pā bhī nahīñ

magar maiñ pyaas kā dariyā huuñ karbalā kī qasam

maiñ tum ko phone karūñgā na tum mujhe message

tumheñ ġhurūr kī mujh ko mirī anā kī qasam

tumhaare shahr se aati hui hawa ki qasam

tamam zaKHm hare ho gae KHuda ki qasam

tamam jism mahakne laga hai apne aap

badan mein phaili hui 'ishq ki waba ki qasam

KHushamadon se mera kaam ban gaya lekin

zamir mar diya main ne iltija ki qasam

tumhein pukar ke hum aaj tak hain sharminda

tumhaare kan se lauTi hui sada ki qasam

agarche ibn-e-'ali ki main KHak-e-pa bhi nahin

magar main pyas ka dariya hun karbala ki qasam

main tum ko phone karunga na tum mujhe message

tumhein ghurur ki mujh ko meri ana ki qasam