tumhaari aatishi nazron ki jumbish par machalne se

tumhārī ātishī nazroñ kī jumbish par machalne se

mirī taḳhlīq kā imkāñ janam letā hai jalne se

abhī uljhā huā hai zāviya hone na hone kā

hamārā ḳhatm ho jaanā na samjhā jaa.e Dhalne se

sañbhālo dastakeñ merī ki mere baad darvāze

na.ī aahaT se ghabrā kar mukar jā.eñge khulne se

udāsī ke nisāboñ meñ hamārī khoj shāmil ho

sisak ījād hotī hai kaf-e-afsos malne se

kisī maddham diye kī lau amānat hai mire andar

maiñ aise hī nahīñ bachtā ziyāda tez chalne se

sunahre ho rahe haiñ sat.h se uThte hue bādal

tire paanī kī sohbat meñ mire kāġhaz ke galne se

tumhaari aatishi nazron ki jumbish par machalne se

meri taKHliq ka imkan janam leta hai jalne se

abhi uljha hua hai zawiya hone na hone ka

hamara KHatm ho jaana na samjha jae Dhalne se

sanbhaalo dastaken meri ki mere baad darwaze

nai aahaT se ghabra kar mukar jaenge khulne se

udasi ke nisabon mein hamari khoj shamil ho

sisak ijad hoti hai kaf-e-afsos malne se

kisi maddham diye ki lau amanat hai mere andar

main aise hi nahin bachta ziyaada tez chalne se

sunahre ho rahe hain sath se uThte hue baadal

tere pani ki sohbat mein mere kaghaz ke galne se