tumhaari baaton pe kuchh eatibar tha hi nahin

tumhārī bātoñ pe kuchh e.atibār thā hī nahīñ

vo jis ko pyaar kahā tum ne pyaar thā hī nahīñ

maiñ kaise vaidoñ hakīmoñ se mashvare kartī

tumhārā pyaar nasha thā buḳhār thā hī nahīñ

ye merī āñkheñ tire paaoñ se lipaTtī ga.iiñ

vagarna rāhoñ meñ koī bhī ḳhaar thā hī nahīñ

maiñ dar-ba-dar na bhaTaktī to aur kyā kartī

sivā-e-ishq koī aur kaar thā hī nahīñ

maiñ maat de ke jo dushman ko apne ghar aa.ī

kisī ke haath meñ phūloñ kā haar thā hī nahīñ

kisī ne haath uThā.e hue the mere liye

so merī pusht pe dushman kā vaar thā hī nahīñ

tumhaari baaton pe kuchh eatibar tha hi nahin

wo jis ko pyar kaha tum ne pyar tha hi nahin

main kaise waidon hakimon se mashware karti

tumhaara pyar nasha tha buKHar tha hi nahin

ye meri aankhen tere paon se lipaTti gain

wagarna rahon mein koi bhi KHar tha hi nahin

main dar-ba-dar na bhaTakti to aur kya karti

siwa-e-ishq koi aur kar tha hi nahin

main mat de ke jo dushman ko apne ghar aai

kisi ke hath mein phulon ka haar tha hi nahin

kisi ne hath uThae hue the mere liye

so meri pusht pe dushman ka war tha hi nahin