tumhaari be-adai ke maze aane lage mujhko

tumhārī be-adā.ī ke maze aane lage mujh ko

jo mere dushman-e-jāñ the vo samjhāne lage mujh ko

tirī furqat meñ hālat ho ga.ī hai aaj vo merī

ye mere chāra-gar zanjīr pahnāne lage mujh ko

ḳhudāyā dekh kar un ko mujhe tujh par yaqīñ aayā

unhīñ meñ to tire jalve nazar aane lage mujh ko

diye ashkoñ ke palkoñ kī muñDeroñ par hue raushan

kabhī jo shām-e-hijrāñ aap yaad aane lage mujh ko

natīja dil ke samjhāne kā nikle bhī to kyā nikle

use samjhāne jo baiThūñ vo samjhāne lage mujh ko

na jin ke jism par sar hai na chehra hai na āñkheñ haiñ

qayāmat hai vahī ā.īna dikhlāne lage mujh ko

jo patthar pheñkne vāloñ ko maiñ ne ġhaur se dekhā

bahut se log un meñ jaane pahchāne lage mujh ko

tumhaari be-adai ke maze aane lage mujh ko

jo mere dushman-e-jaan the wo samjhane lage mujh ko

teri furqat mein haalat ho gai hai aaj wo meri

ye mere chaara-gar zanjir pahnane lage mujh ko

KHudaya dekh kar un ko mujhe tujh par yaqin aaya

unhin mein to tere jalwe nazar aane lage mujh ko

diye ashkon ke palkon ki munDeron par hue raushan

kabhi jo sham-e-hijran aap yaad aane lage mujh ko

natija dil ke samjhane ka nikle bhi to kya nikle

use samjhane jo baiThun wo samjhane lage mujh ko

na jin ke jism par sar hai na chehra hai na aankhen hain

qayamat hai wahi aaina dikhlane lage mujh ko

jo patthar phenkne walon ko main ne ghaur se dekha

bahut se log un mein jaane pahchane lage mujh ko