tumhaari yaad jo aai to de ke aah gai

tumhārī yaad jo aa.ī to de ke aah ga.ī

banā ke dard ko apnā yahāñ gavāh ga.ī

palaT ke aaoge tum is liye ba-hasrat-o-yās

tumhāre pīchhe baḌī duur tak nigāh ga.ī

milā ke chhoḌ diyā āḳhirash mohabbat ne

tumhāre ghar hī ga.ī jo hamārī raah ga.ī

vo aarzū jo dabe paañv aa.ī thī dil meñ

banā ke mujh ko mire dil kā bādshāh ga.ī

na chhoḌā ham ko kahīñ kā tumhārī ulfat ne

judā.ī de ke qayāmat kā intibāh ga.ī

ye sach hai ham ne bhī aksar nibāhī hai us se

hamāre saath bhī ye zindagī nibāh ga.ī

vo ek laḌkī samajhte the nā-samajh jis ko

hamāre sher pe vo kar ke vaah vaah ga.ī

milī thī raah meñ rusvā.ī jo hameñ 'jāmī'

judā huī to ḳhushī de ke be-panāh ga.ī

tumhaari yaad jo aai to de ke aah gai

bana ke dard ko apna yahan gawah gai

palaT ke aaoge tum is liye ba-hasrat-o-yas

tumhaare pichhe baDi dur tak nigah gai

mila ke chhoD diya aaKHirash mohabbat ne

tumhaare ghar hi gai jo hamari rah gai

wo aarzu jo dabe panw aai thi dil mein

bana ke mujh ko mere dil ka baadshah gai

na chhoDa hum ko kahin ka tumhaari ulfat ne

judai de ke qayamat ka intibah gai

ye sach hai hum ne bhi aksar nibahi hai us se

hamare sath bhi ye zindagi nibah gai

wo ek laDki samajhte the na-samajh jis ko

hamare sher pe wo kar ke wah wah gai

mili thi rah mein ruswai jo hamein 'jami'

juda hui to KHushi de ke be-panah gai