tumhaari yaad mein aankhen bhigo raha hun main

tumhārī yaad meñ āñkheñ bhigo rahā huuñ maiñ

magar zamāna samajhtā hai ro rahā huuñ maiñ

kamāl ye hai ki ḳhud apne dil ke tāroñ meñ

hasīn ishq ke motī piro rahā huuñ maiñ

kaTī hai umr ye saarī butoñ kī ulfat meñ

magar ab apne gunāhoñ ko dho rahā huuñ maiñ

mire yaqīn kā is se hī imtihāñ hogā

bhañvar meñ ishq ke kashtī Dubo rahā huuñ maiñ

mile to us ko nishānī vo duuñ mohabbat kī

uThā ke shāne pe apne jo Dho rahā huuñ maiñ

ḳhayāl-e-ābla-pā.ī hai har qadam mujh ko

so apnī raah meñ kāñTe bhī bo rahā huuñ maiñ

lagā rahe haiñ vo mehñdī ḳhushī kī hāthoñ meñ

sukūn dil kā magar 'faiz' kho rahā huuñ maiñ

tumhaari yaad mein aankhen bhigo raha hun main

magar zamana samajhta hai ro raha hun main

kamal ye hai ki KHud apne dil ke taron mein

hasin ishq ke moti piro raha hun main

kaTi hai umr ye sari buton ki ulfat mein

magar ab apne gunahon ko dho raha hun main

mere yaqin ka is se hi imtihan hoga

bhanwar mein ishq ke kashti Dubo raha hun main

mile to us ko nishani wo dun mohabbat ki

uTha ke shane pe apne jo Dho raha hun main

KHayal-e-abla-pai hai har qadam mujh ko

so apni rah mein kanTe bhi bo raha hun main

laga rahe hain wo mehndi KHushi ki hathon mein

sukun dil ka magar 'faiz' kho raha hun main