تمہاری یاد سے اتنا تو فائدہ ہوگا

تمہاری یاد سے اتنا تو فائدہ ہوگا

ہمارا زخم جگر اور بھی ہرا ہوگا

ہمارے اور تمہارے ہی درمیاں اک دن

کسے خبر تھی کہ صدیوں کا فاصلہ ہوگا

اندھیری رات میں گر روشنی نظر آئے

یہ جان لو کہ ہمارا ہی دل جلا ہوگا

ہر ایک چہرہ ہے فی الحال جانا پہچانا

ہر ایک چہرہ مگر کل نیا نیا ہوگا

بہت سے خوابوں میں اک یہ بھی خواب ہے اپنا

ہمارا جینے کا انداز ہی جدا ہوگا

عزیزو آج کی صحبت کو آخری سمجھو

تمہارے ساتھ نہ کل بزم میں ضیاؔ ہوگا