tumhaari yaad se nikli udasi

tumhārī yaad se niklī udāsī

mujhe taslīm hai aisī udāsī

milan vo āḳhirī bhūlā na apnā

na us ke baad kī pahlī udāsī

samundar se bhī gahrā dil hamārā

hamāre dil se bhī gahrī udāsī

bahut se pairahan badle haiñ dil ne

magar āḳhir ko phir pahnī udāsī

kisī ne apne andar jazb kar lī

kisī ne chehre tak rakkhī udāsī

kisī ke lab pe hai muskān jhūTī

kisī kī shakl par farzī udāsī

koī harf-e-suḳhan tak le gayā hai

kisī ne saaz par gaa.ī udāsī

kisī taḳhlīq meñ Dhal jaa.e jab tū

har ik pahlū se hai achchhī udāsī

abhī shor-e-tarab tham jā.egā jab

hamāre qalb se gūñjī udāsī

zarā sī der ḳhushiyoñ kī fazā.eñ

phir is ke baad ik lambī udāsī

ḳhud apne aap tak simTe huoñ kī

baḌī hī duur tak phailī udāsī

udaas is baar maiñ ye soch kar huuñ

tire hote hue kaisī udāsī

udāsī ne bhī āḳhir tang aa kar

ye mujh se kah diyā itnī udāsī

'amar' hadd-e-nazar tak dekhtā huuñ

maiñ tujh meñ bas udāsī hī udāsī

tumhaari yaad se nikli udasi

mujhe taslim hai aisi udasi

milan wo aaKHiri bhula na apna

na us ke baad ki pahli udasi

samundar se bhi gahra dil hamara

hamare dil se bhi gahri udasi

bahut se pairahan badle hain dil ne

magar aaKHir ko phir pahni udasi

kisi ne apne andar jazb kar li

kisi ne chehre tak rakkhi udasi

kisi ke lab pe hai muskan jhuTi

kisi ki shakl par farzi udasi

koi harf-e-suKHan tak le gaya hai

kisi ne saz par gai udasi

kisi taKHliq mein Dhal jae jab tu

har ek pahlu se hai achchhi udasi

abhi shor-e-tarab tham jaega jab

hamare qalb se gunji udasi

zara si der KHushiyon ki fazaen

phir is ke baad ek lambi udasi

KHud apne aap tak simTe huon ki

baDi hi dur tak phaili udasi

udas is bar main ye soch kar hun

tere hote hue kaisi udasi

udasi ne bhi aaKHir tang aa kar

ye mujh se kah diya itni udasi

'amar' hadd-e-nazar tak dekhta hun

main tujh mein bas udasi hi udasi